古早,有一所在,有一个戆人.
此个人的老父讲:
"明仔早是过年.
汝提钱去买面粉,与肉,酒,
乌糖与鸭.
尚要做衫给汝,
布亦续买来."

此个人讲:"好."
携篮去街仔.买物返来,到半路,
适到一间寺,寺门口有二只狗,
一只嘴开开.
此个打算:"敢是腹肚饥?"
买来的肉一概倒对狗嘴落去.

又行几步仔,听见篮内的鸭在哮.
想:"敢是嘴干?"
放置得溪仔,给伊食水.
鸭落去水里,就真欢喜,
愈泅愈去.

此个人真惊,
彼个时候,篮仔内的面粉提出来,
拢掷去,亦不倚来.
又更糖提起来,掷去,
亦是不倚来.

尾手,伊就走对竹围去,
看见竹在震动.
"啊,竹啊,汝寒到挡没住的乎?"
布提起来,拢与伊包包咧.

又更行几步,
看见石头裂开,讲:
"石啊,汝嘴干乎?"
篮仔内的酒瓶提起来,斟了了,
即返来.

[伊心]老父问:
"汝去街仔买物,买来无?"

此个人自己在路里所做的事情,
一伍一什讲给伊听.

[伊心]老父就讲:
"明仔日是过年,此款真无法度."