经我o地抽样调查发现，原来好多艺人都曾经有撞鬼经历，亦都从调查中发现，如果遇见o的「污糟o野」时，最紧要淡定，咁就可以逢凶化吉，正所谓「人怕鬼三分，鬼怕人七分」嘛！

俾鬼摸－陈敏之
　唔知系咪前排做o野做得太累，导致脑电波太弱。有晚困o左冇几耐，突然感到有一股力量压住自己，不但全身唔郁得，连想叫出声都唔得，好辛苦先睁开对眼睇到当时系半夜两点钟。过o左冇几耐我又感觉有只手好慢咁由额头开始摸我，一直摸o左好耐，由于我已经好累，第二朝又要开早，所以我突然由惊变成愤怒，心谂点解佢咁耐都唔走o架！于是我用尽气力叫到出声为止，仲o系度狂闹 o个只o野，最后佢都走o左，之后我成个人都舒服晒！

日本猛鬼酒店－赵学而
　我出o左名大胆，所以每次出埠都一个人困一间房，旧年我去日本工干，同成班工作人员入住一间酒店，好自然地我亦系一个人住一间房，但有一晚当我困困o下，突然感觉到左脚麻痹，跟住痹到上左耳，之后又到轮到右边脚痹，同样痹到上右耳，我成个人都郁唔到，想叫又叫唔出声，惟有念心经，过o左一阵，我以为冇事，但又感觉到有一只似手又似脚o既物体踏住我个肚，我惊到大叫，今次终于叫得出声，个人仲郁得到，我望o下个钟，系早上五点零二分，我拿拿临走落大堂坐天光，等o的工作人员起身，之后我听番一位工作人员讲，原来o个间系有名o既猛鬼酒店o黎o架！

「喃无阿弥陀佛」赶鬼－袁彩云
　o个次系我首次去美国华盛顿玩，一踏入酒店房我已经好唔舒服，平时我一觉就困到天光，但o个晚点都困唔着，半夜仲突然间感觉到有个人影好快咁由我右边床边走到床尾，因为太惊，所以我冇起身望清楚，但就不停o系心里面念『喃无阿弥陀佛』，虽然之后再冇见到黑影，但第二日当我同隔离房o既朋友提及此事时，原来佢都有同样经历，后来我先知，原来o个间酒店历史悠久，o系华盛顿打仗时期已经存在呢！

坟场鬼火－蒙嘉慧
　我有两次恐怖经历，第一次系细个o个阵，我全家住o系村屋，我同妈咪困到半夜都同时听到大门外有『人』拖住铁炼行路o既声音，因为太惊，所以我o地最后都冇开门睇o下发生乜o野事。另一次系几年前我同李灿森合作拍一套鬼电影时，有晚我o地去坟场拍戏，竟然见到有个荒废o左o既坟墓突然着起小火，当时已经系凌晨五点几，而在场o既工作人员亦一直冇行过埋去，点解会无端端起火呀？谂落都有o的惊！
艺人撞鬼实录２
凌晨四点耳边响起单车声－谭小环
有次我去大西洋城登台，当踏入酒店房间时，觉得浑身不自在，由于当时我先到过助手的房间后才入自己的房，在她的房间感觉并无任何不妥，但在自己房间就特别唔舒服，到半夜四点左右，我的耳边突然响起单车炼我声音，但当时酒店外的街道很静，连车声也没有，我心知不妙，便将妈咪给我的玉佩拿出来，过了约半小时后，便再入睡了。之后，妈咪每年都在泰国四面佛替我求一道符，给我随身携带保平安。

学校内见鬼－车婉婉
我小学读o个间学校以前系乱葬岗，所以成日有o的鬼故流传，不过o个阵细个唔识惊，有一次仲同几个同学昵埋o系厕所，谂住吓另一个同学，点知等等o下见到一个白色物体经过，起初以为系幻觉，又以为系同学伸个头出o黎吓我o地，后来问番佢佢话我o地黐线，仲话头先都唔得闲理我o地，o个阵大家先怀疑可能系见鬼呢！

水喉自动开关－黄泆潼
较早前我去o左泰国参与一部鬼电影o既外景拍摄，因为入住o个间酒店都几旧，所以俾我o既感觉唔系太好。咁o岩大部份工作人员都住o系九楼，我则住八楼。
o系最初o个几日都冇乜o野发生，但最后一晚我困困o下，就听到洗手间传出好清楚 o既水喉声，起初好慢，后来就愈开愈大。o个刻都几惊，我又唔敢望洗手间有冇o野，但系又困唔着喎！之后等o左好耐，o的水喉声先渐渐收细返。为o左保平安，我经常都会将呢道由朋友帮我求o既护身符放o系银包o架！

夜半夺命鬼爪－薛家燕
小时候我住在钻石山的石屋，有日我同家姐见隔离屋的阿伯将窗门的玻璃油上绿油，问他点解，佢话前一晚困觉时见到有一只爪在窗外猛抓块玻璃，于是便油上绿油，如果再有爪抓玻璃，佢都唔会见到，咁就冇咁惊。点知第二日我们见到附近有救伤车，原来o个个阿伯出o左事，送去医院后仲死埋添！不过到底阿伯系因病还是真系因o个只爪而死就无从稽考，因为当时只有我和家姐知道有关鬼爪的事呢！

会弹的汽水罐－杨怡
好细个o既时候，有晚我坐巴士途经沙田某处，因为红灯着o左，所以巴士停低等候， o系呢个时候，我望到街上一个汽水罐竟然直立式咁弹o下弹o下，每次都弹得好远，而且仲弹到两、三尺咁高，我开头以为有人用线拉住个罐，但睇清楚之后，知道一定冇可能，因为附近唔只冇人，仲连一座建筑物都冇，咁你话奇唔奇呀！